我的....... 婚外情！by 大哥誠
我係一條阿叔！
一條年過半百嘅大叔！
同塵世間好多阿叔一樣，每日返工放工然後返屋企食晚飯，第二朝重覆以上步驟再嚟過，一星期五日一個月四個星期一年十二個月，做咗同一個行業三十幾年，無乜大成就尚幸唔使揸兜！後生時愛蒲愛玩夜夜笙歌晚晚去威，睇住老蘭方興未艾到炙手可熱再到淪為自由行景點，Underground 變 DD 變番 Underground 再變 Volar，從龍精虎猛玩到通宵達旦而家凌晨十二點對眼就要靠牙籤嚟撐，喜愛夜蒲到早訓中佬。曾經肥到兩個下巴頸與頭身毫無分割線，一身的皺肉像千頁岩一樣撘拉著脂肪沉積而成的肥膏。痛定思痛下努力減去一身肥肉做番個正常大叔！
直到兩年幾三年前，誤交損友耳濡目染，蔫豬頭碰上萌鼻菩薩，姣婆遇着脂粉客之下發展出一段婚外情 ........
從此我不安於室，隔三差五往外跑，早出晚歸繾綣躁動得身水身汗，上山落水日頭夜晚水乳交融，每星期總有幾天每個週末都不離不棄，不認不認還需認，這段婚外情應該會一直離不開留不低直至 ...... 我再無力滿足它的苛刻要求！
我嘅婚外情人來自浪漫熱情嘅夏威夷，叫 Ironman，佢擇偶條件要先游水再踩單車然後跑步，幾年之前我同佢初次邂逅於鹿頸新娘潭嘅時時食賽事，然後同一班精神狀態異於常人嘅朋友一齊戀上佢，幾年過去感情與日俱增，經歷過不同嘅考驗，515，70.3 Half Ironman 到 226 Full Ironman，每次激情過後都話要暫時分手，但不旋踵又夢牽魂繫再入塵網相約會面。還好有這段不倫之戀嘅並非我孤獨一人，而係長期有一班 MidageonG 院友同病相憐一齊走呢條崎嶇之路！
. 
好多人話 Triathlon 好難相處，Ironman 更加唔係正常人可以結交嘅伙伴，但其實只要有心只要肯流汗，我相信任何人都可以同 Triathlon 相交相知，體能與體力絕對可以通過鍛練得番嚟，重點只係意志！同世間萬事萬物一樣，您要愛佢，必先要付出，If you have a body , You can be an IRONMAN !
呢段婚外情帶畀我健康嘅身體同堅毅嘅意志，我相信未來日子都會同佢走下去！
而且，難得我家主席唔反對呢段情，仲想點？
