Post
「好趕時間呀！」by 282828
趣談一則！
好多時雪友的一個必吹話題，滑得有幾快！
我呀係邊到邊到滑到自己驚呀？
或
你跟我滑？你滑得好快喎！跟唔到喎～～！
或
上次手機測速度APP有成 XX km/h呀！......
那當中話『好快』其實有幾快呢？？！其實呢，當中係有世界記錄的，在2015年由Edmond Plawczyk 創下snowboard 203.275 km/h
而SKI就是由Ivan Origone和Valentina Greggio創下254.958kph (158.424 mph) 和247.038kph (153,502mph)
也有mountain bike的最高速由Eric Barone創下223.30 km/h (138.752 mph)世界記錄，都在同一標準的雪道比！
係真唔真呀～ by 282828
廣州美林湖室內滑雪場18年九月左右開業？
剛收內地雪友發來的簡訊，說甚麼新一季開始囉！甚麼甚麼甚麼......最後都是植入廣告一則，但比較吸引我的一句是，『廣州美林湖室內滑雪場18年九月左右開業』！又開一間？？！！錯！廣州係重來都未有開過！上微博查完全無消息？連幻夢圖都無一張！但簡訊內言之鑿鑿確有其事！那等一下看戲食花生吧！
那原本聲勢浩大的廣州萬達文化旅游城室内滑雪場，連建築物都起到七七八八，話今年年中開的，都推遲至19年了（原因是好多人都知哈尔濱萬達城的冰雪中心事件的。不知的話，簡單說那個哈尔濱萬達已一早賣盤給外國......）,現在連廣州的雪友都說𥚃面都無工友開工？？！那真的像香港以前的翻版變『方舟』！（香港講過開室內滑雪場？係『講過』但是十幾年前的舊文一則……）
真的開不了？？！！咁又唔會，話晒國內財源滾滾，一間『融創』集團攪掂晒啦！
話說今年六月尾時在廣州塔辦了一場“為更美好的廣州”—『融創』廣州萬達城開業倒數（看吧！轉了名字哦！）一周年發表會，會上宣稱，廣州萬達城將於2019年6月15日全面開業（看清楚啊！是萬達城），也稱意味着配套的萬達茂娛雪樂園也將正式開業！（是兩件事來的！它是分開來說的，到時萬達城開了不代表娛雪樂園開啊！）
而且說配套雪场主體结構已基本完成，预计12月開始吊装造雪機！到時雪花話從30米高的空中飄落（咪攪啦！），地面雪層厚度達40厘米。（係先好講！）
廣州萬達城其實還包括室内滑雪樂園、電影科技樂園、室内水樂園、未来科技秀場等核心八大區！
發表會中還說廣州萬達城屋面舖裝已經基本完成，即將進入造雪测試階段！
萬達茂娛雪樂園的滑雪場總建築面積達到75000平方米(看清楚啊！是總建築面積不是『滑雪場』總面積！) 。滑雪場設有4條雪道（都是比哈尔濱細一點，哈尔濱8萬平方，6條雪道）：雪橇滑道、中級滑道、初級滑道和初學者滑道，滑道最大落差66米，最大坡度21°，其中初級滑道最長460米。話說造出中國北南各一個世界最大的室內滑雪場！
在2019年6月13日，滑雪場正式對外開放，到時可同時容纳3000人游玩。（迫死人咩！）
國內室內滑雪場除了有比較出名喬波北京和紹興外，還有甚麼？其實真是還有的比較近期開業的重慶仙女山室内滑雪場！
滑道長度有120米和160米两種，雪厚度約50厘米，温度零下3-5℃，一個比深圳世窗大一點的場！
還有一個是重慶際華園冰雪世界，位於兩江新區龍興工業院！滑雪場總建築面積達到22500平方米，滑雪場總面積12200平方米，雪道厚度均在60—80厘米，使用“魔毯”上山，分为專業滑雪道240米，宽約35米、練習滑雪道60米和平面戲雪區60米X70米，含冰球、冰壶道其他玩意！但......又是現在只有文字檔和幻夢圖幾張！
淺談無人機 by 282828
現在無人機連鏡頭確是低價未見低，以前上萬一部至而家幾千都有，人人都有一部。好多人滑雪時都想如視頻選手般有無人機跟拍，但一般雪場大多是禁飛的，或要先申請當地無人機牌照，再去雪場申請許可，但一般民拍都是禁止的。原因好簡單，你一部我一部他與她又一部，整個山頭都係無人機。若無電（因溫度低）失控，兩機互撞，跌番落地撞到人受傷邊個賠？？！(撞到小朋友更大鑊！點賠番個仔比人？？！！)
你話你賠無問題？錯了！你的事小！一般其他國家民眾一定必告出事雪場，雪場心諗我收你幾百蚊，因為你想拍航拍導致撞傷人，而要我雪場被賠錢？？！！咪傻啦！比你係雪場老闆你會點諗？？！！
那無人機真是一無事處，那又不是的！
近日英國一名65歲登山家艾倫（Rick Allen），日前在喜馬拉雅山登山時，不慎滑落冰崖，被認為已經喪命！不過在失蹤36小時後，一台無人機拍到他的身影，艾倫順利被救回，影片曝光！
艾倫是相當知名的蘇格蘭登山家，他在攀登8041公尺高的時候，從冰崖上墜落，基地營一直等不到他返回，一名廚師在山坡發現他的背包，才驚覺艾倫恐出意外。
艾倫在失蹤36小時後，2名波蘭雪山友出動無人機搜尋艾倫蹤影，無人機繞著高山飛行，果然拍到在山邊攀爬的艾倫，同伴也順利得知艾倫的位置。
在山友的營救下，艾倫抵達基地營時僅受到輕傷、凍傷，最後由直升機後送至醫院。艾倫曾經對無人機非常反感，此事件讓他完全改觀！
YAHOO新聞
那關滑雪甚麼事呢？早前我在另一頻道曾寫1617雪季，日本softbank受北海道電信通信局和內政部委託，試在無人機和科研氣球搭上無線小型中轉台，從而探測智能手機的位置，有助於白雪覆蓋的山脈尋找迷路或失蹤者！
16年12月時的實驗中，能夠確定找出被掩埋約4米深的智能手機位置。其間還測試無人機和科研氣球對比，因無人機運行是約20至30分鐘(當然不是用DXI啦)，而科研氣球約2小時至3小時可以連續運行，所以得出急於搶救使用無人機，如果要搜索則使用科研氣球！
當然現在還在測試中，還有各種條件影響探測結果，如雪的水分，手機的頻率，電波的角度等！
Source: 日本YAHOO新聞ITmedia NEWS !
上面講的當然不是說在雪場內用，主要是針對BC或樹林滑粉雪迷路失蹤者，雪崩事後救人用！可能你說打手機求救嘛！的確是對的！（遇雪崩後你在雪內還可以用手機？？！！）但一般手機訊號在山間有時確收不到的或訊號不夠強，就算現在有時衛星手機在某一些地區都不一定收到的時候，你認為你的手機一定萬能？（有手機當然好過無手機！但要記得張網絡咭不要過期啊！haahha~ 事出有因，之後再說！）
那你說有沒有真實事件？有的！！！還真實拍了出來！（當然我相信有剪輯過啦）一位超出名紅牛SKIER Jon Olsson選手（不知他是誰？那看看他的車和特製雪迷彩包膠吧！）和朋友在加拿大滑BC時途中迷路，GPS、地圖甚麼都看了，但還是萬無頭緒，最後拿了部無人機出來，放機去看週圍情況和出路。但都..... 最後都是從零碎片段加上經驗成功回到公路，還有順風車回酒店添！
雖然不是由無人機找到出路，但這確是一個辦法，好過你在萬山呆衝！
（片段由07：04開始）
沒有最高，只有更高 by 282828
當你自己還說或與雪友吹牛話，我滑過了黑色線道，雙黑線，超陡的甚麼甚麼時！
早幾日紅牛波蘭SKIER贊助選手Andrzej Bargiel重新定義了從世界最高山滑雪滑下陡坡的紀錄，創造了歷史，成為第一個從K2山頂滑下來的人！是世界上第二高的山峰，海拔8,611米！！！看看甚麼叫陡！
Jeremy Jones VS Jeremy Jones by 282828
最近因為製作影片時一時手快，把兩個Jeremy Jones合併了當一個人說，最後給雪友說了出來，我才意識到這是個非常有趣的題目！ 之後我都問了其他朋友，他們都說不是得一個Jeremy Jones嗎？！ 當然精明如你一定第一句話： 一早知啦！唔係唔知呀！好基本喎！ 但在外國，除了是業內或滑雪網站專業編輯外，其實在大量一般群眾眼中對這兩個名人仍然存在混淆。不然外國網站或雜誌不會隔兩三年便會出這個欄目！ 兩個職業PRO RIDERS在各自家領域都有超出色表現，但都用同一個名稱出道-Jeremy Jones ！！！(在YT頻道有個網紅打籃球的都叫Jeremy Jones！如果你打Jeremy Jones仲係第一個出現添！打少一個S反出現番滑雪的！) 可能大眾是只偏一方style有興趣, 亦可能外國職業滑雪選手有如天上䌓星般多到眼花，更可能有人是who care!心情（的確是除了滑雪，還有很多更出色的各種運動選手！），或可能淘汰得太快，是誰都攪不清又有一名新進超新星了！ 一個Jeremy Jones（大山）是backcountry 的 legend，另一位Jeremy Jones，是出名玩街的freestyle rider。在一個極限運動行業內，個人特色是一個非常重要的事項，粉絲和各品牌等都更容易認出，但兩名Jeremy Jones對同名這個問題，看來都不太介意！（好像？？！！其實......） 在我上網再查一下時，發現更多有趣的資料！ Jeremy Jones（Freerider）（行山鍾） 出生：1975年 首選地形：BC 來自：馬薩諸塞州科德角 著名的大山Freerider和擁有自己品牌Jones滑雪板創始人的Jeremy Jones，King...
日藉老師(一) - 山崎勇龟 by 282828
今日再講當年日本方面首先吸引我的男選手當然不能不提-山崎勇龟！那時候七成滑雪雜誌都是他做封面; 大量不同的講學DVD; 最重要是那時他已有做跳台打空翻的動作! 他的贊助板美國Lib Tech Snowboard 專誠做一塊日本專用板給他，板上的圖案是有海龜或海龜骨頭圖案，這個創舉要算到近年日本選手國母和宏才被打破（CAPITA KAZU KOKUBO PRO）。連國母他自己都說滑了那麼多年終於有塊自己為名的專用板是多高興的事！除板外還有32的勇龟專屬雪鞋; FLUX專屬固定器（要由外國品牌母公司認證才叫”高”，如果是一般國家{地區代理}都算超利害，但比起母公司就……人工和待遇各大不同㗎！）
現在他算是從最前前線退下來了，但還是用Lib Tech Snowboard板和Bent Metal 固定器（當然不是專屬板，還有些品牌贊助，重心改為是滑板了，是合同会社横乗文化芸術大学校／ヨコノリ大学カガヤキCANVAS的名誉教授，還在PSJ滑板科学院教學http://www.skateboards.jp（知道2020日本奧運會有滑板比賽吧！）續......
算是近期的視頻了！
山崎勇龟教學DVD
32專屬雪鞋
FLUX專屬固定器
Lib Tech 海龜專屬板
「老師們」!!! by 282828
裝備嘢有時間再寫，今次開個新題叫「老師們」！等大家無咁悶先！我的「老師們」當然是指滑雪啦！
第一位當然是世界之窗室內滑雪場官方駐場教練（好早幾幾幾年前已經無咗哩個職位了），叫阿蓮（係唔係哩個蓮字都唔確定），都上咗四五堂。當年¥50人仔一堂一個鐘，當然盡上啦！平到咁，¥50人仔有條友睇住你滑成個鐘而佢又指導你喎！叫你上去滑雪D朋友都未必做到！
大約學到轉S就無再上堂（佢都轉職了），咁點呢！？除了雪友的指點外，那時都興自己買D歐美日滑雪雜誌睇，隨書都興有隻VCD碟送（咩年代呀～），內容有⋯⋯初級教學啦，有雪場分享啦，技巧介紹及板類分類等（日文睇得明咩？？！！本人第一招學的平花就是從這類碟學的，那時日本還有一個學會叫「手摺狂會」專玩平花的會，個個狂人，特別是相内會長，當時日本滑雪雜誌就拍下，一個FS900平花的多格圖片，先不說甚麼「偷」位，先是你有能力就做一個偷位FS900再說，當中也認識到日本各snowboarder們，不過通常買了三四年都不會再買，因為每年頭兩三期內容基本上是重覆的！）
而當時（而家都係）本人比較喜愛美國選手有JP Walker「日本行人」和Travis Rice「旅遊米」，因為有性格！「日本行人」玩得型格（也是最廢話、百搭的一句，而我鍾意是他影片動作都是有細位，有些動作是穩定中又帶點花巧小動作，創意感滿分，又有神來之筆的感覺。最爆是有一段滑雪視頻他話Jeremy Jones「行山鍾」偷了他的一個新招，那時他那招還未錄影下來，但「行山鍾」已上傳上網了！（其實私下是老友）近幾年他主要滑一兩下『灑』的便收工，話晒都上咗神枱不用咁盡）！
「旅遊米」就為當年佢去跳日本TokyoDome的big air X-Trail JAM,通常選手們都會因應對手或較比賽難度、比賽結果而選擇點跳，而佢由初賽到決賽，都係一招！係滑一招！有如《柔道龍虎榜》梁家輝的一樣，我得一招姐！不過一招KO你！現實當然不如電影啦！決賽時land時手點地扣了分！但已充分表現「自我」和信心表現！
（十幾年前已玩緊ROLL！）
另一事為在First Descent snowboard電影，當年「旅遊米」不是主演，是演Shaun White「喪白」的朋友角色（「喪白」不是不喜歡，都是非常利害的一角｛指現在，而當年就......｝，但『比賽商業氣味太濃了，但係如果唔濃，食風咩！），不過這個朋友的一段Backcountry（簡BC）客串演出驚為天人，基本上主演們都比下去，還被剪下來當預告一部份，他那段完全是要經驗，技術和膽色集合於一身！缺一不可！(當然同場Legend的Terje Haakonsen更堅啦！當年已轉型BC的嚮導⋯⋯)
同場Terje Haakonsen
近年比較紅的當然不能不說SCOTT STEVENS 「角．史提芬」，他的『單腳』近幾年玩法絕對出神入化，花招’S絕對多到可以出教學書，但不是最早第一人！
先待續一下！下次講影響比較深的日本老師們！
保你一世咩之(四) by 282828
拖到最後終於寫頭盔，也是最多人心塞的迷思！
俗語話齋：又要威，又要戴頭盔！（真係老X土到“口口犬”）呢句嘢主要講以前的電單車用家的！現在小學生連都知電單車，單車要玩得型、專，挭係戴頭盔啦！Fullset概念嘛！
那滑雪呢？看滑雪影片那些選手都無用喎！如果你是用滑雪技巧影片賺一餐半餐當然唔會用啦！專業嘛！型！夠衝！一個滑雪專業贊助選手，點會用頭盔㗎！
對不對？？？？？？
但有另一說法就是，如果是專業選手有品牌贊助（當然是指有金錢上的簽約贊助啦，一份長遠有錢的飯票呢！）咁又另一說法喇，安全第一嘛！（當然收得錢當然要做嘢啦，唔做？下季咪無你份囉！）確保安全，我上次練習有用，避左一下撞rail..bababab....!（事實是好多專業贊助選手私下練習都有用頭盔的，到拍影片時才唔用，或拍影片時試了幾次後，到正式拍才換冷帽！因為身價愈高技術愈好的，都有「經理人」處理他/她的事，經理人點會放手令他的搖錢樹提早掛鞋呢？）
咁要唔要買呀？我見你282828的影片都無用啦！......頭盔我有四個，每次出發都要攞出去的！而用唔用就看天氣、心情啦……當然也有不可抗力的時候！
現在好多國內滑雪場，只要場內有freeride，平板推坡都硬性規定要用頭盔。不用的話就退票或要你租肉酸粉紅頭盔！咁嘅情況寧願自己買個啦！
你可以話那是國内問題啫，那些人唔識滑啫（唔好咁講呀！早六七年都還可以咁講，現在要比技術……老實講，香港落伍啦！另一方面當然真的很多人真係滑不好或完全是危險人物啦！）韓國park一般都要使用頭盔的，一些還會叫你即場簽生死書！但有時又無人理喎，奇怪！（試過在韓國同一個park，兩個人不同月份，兩個待遇！）
那snowboard發源地美國呢？那邊真的無規定，但好多時自發性為主，但忽然某一年某一個出名玩park的美國滑雪場就反推出規定park場內禁止使用頭盔！！？？因為頭盔使用者受傷率高於不使用者！反向思考！？
都係嗰句啦！頭係自己的！一般滑雪頭盔由七百至三千幾都有，現時技術方面來說都是那幾道板斧，吸震、透氣、會卸力，BOA系統、內置耳機、頭盔連大雪鏡（點樣？咪接近成個戰機頭盔咁囉！）或成個星戰白兵頭盔咁！
反而想講下點選合適的頭盔！首先要親身試，這幾年各頭盔品牌的頭圍都愈做愈細！同一品牌明明我用開L，現在巳進駐XXXL（真係……頭盔頭圍明明一樣）！頭盔內的小半鵝型凹洞（應該無人會覺得自己個頭係圓型掛！）不能滿足每一個人的頭型，即使同一個品牌但不同型號都會有些出入！試戴後，感覺一下，兩側會否有夾住的感覺？前後空位會否過大導致頭盔前後移？要是全都剛剛好，適合的，丁點「夾」的感覺都沒有的話就最GOOD! (點解？簡單化咁講因為滑雪期間，頭會因為運動而有少許脹大，如果一開始買時已有「夾」的感覺，到你滑到中段時「夾」的感覺會因頭脹而轉換成「痛」，一路滑一路痛又何苦呢？～曾經親耳聽過一些客人話自己識某哥滑了七八年了，某哥說買個頭盔一定要「夾」，滑起來有些痛便對了！吓？？……當然頭是你的，你喜歡啦～如果以上都無問題，之後便是價錢和款式的選擇了！
我近幾年開始轉滑backcountry ，反而使用頭盔的機會提高了！（怕死嘛！估計不了的因數太高，而且在惡劣環境有意想不到的用途添！）
當然頭盔的配搭用方法就因人而異，有人放雪鏡在頭盔外或內，各有各理由。再內配冷帽或棒球帽，貼貼紙或再套動物頭套。或加耳機，閃燈或GoPro等等!
最後名句：用頭盔不是你的技術差，而是怕其他人滑得屎！他超高速和控制不了的滑法撞到你時，七成的受傷個「滑然輪」都是在你身上，而他通常拍拍身便行得走得！
下次講器材？No la~個個星期打咁多字唔係辦法！下星期講下我的「老師們」！
1. 氣孔可自由開關
2. BOA扭轉系統
3. 有鴨舌型款
4. 星戰白兵頭盔,面罩位可拆
5. 頭盔連大雪鏡
保你一世咩之(三) by 282828
今週寫護臀褲！也是玩snowboard幾重要的保護裝備。無用的話，輕則patpat紫紫黑黑，重則尾龍骨末端破裂（不是講笑啊！ 就算懂正確的摔倒方法，會有幫助，但都會痛的！！！）早期本人第一次買的就是護臀褲，當然那時不是『褲』啦！嬰孩尿布式型態的（沒有正面的，如圖1）：
圖1
一條魔術貼在腰部，兩腿各另有一條魔術貼作固定之用，patpat部分就有一大片的EVA膠軟作保護用！你問足唔足夠？......比起無用的好囉！但當時已經如獲至寶（在那個年代），你說用了都痛，那買來幹嗎呢？！『它』只是一個輔助啦！內裡要再貼一塊較厚EVA膠軟墊或有人買那些孩童學行用的ABC墊作真正保護（即使現在已流行仿真褲型的護臀褲，也是有不少人會加EVA膠軟墊在內，厚薄自定! ），雙劍合璧下，真的是可以patpat摔了而不知痛為何物（當然看你加幾厚了）。去外國通常只用『尿布』都已頂到，但因那時代興寬、闊、大的款式，太薄反而會頂不住條滑雪褲向下滑（皮帶？當時是裝飾用的，完全無拉緊功能！hahah~），所以可以拿出國用！
EVA膠軟墊
後來護臀『褲』真的流行起來了，各滑雪牌都有自家出品，不同厚薄都有（記得有品牌出過滑浪褲款，說穿起來FREE～ D，可是它因爲太FREE而全力走位，出了一兩年就無了！），當然也有近年興起的新科技，又輕又薄又保護。而有些就會在原本已有的厚度上再加新科技，得唔得？都是那句啦，你可以受到有幾級痛呢？
如何選一條合適的護臀褲？（如果你說你是不會用的，可以跳過這段！！），是否緊貼、還是寬鬆就要試穿一定要選合適的。不要太介懷是否女裝（保護性和色水不會有太大分別，著在內誰知呢？），有些品牌的尺寸都是偏大的，查驗會否走位。自己有雪褲在手就最好（冇就問店家借一下）連護臀褲一齊試穿，看做起動作時有否不適！
護臀褲都有長短之分，短就短褲款（廢話）、長就有連護膝的，保暖些，穿著方便點，但那個護膝偏薄和可能會走位（因為每個人膝蓋高度都不一樣），真的要試真點啊！再看看價錢是否合適！！都OK的話便決之～
進階了，摔的機會少了，或開始懂『就位』跌，加上新科技的保護受傷情況就會減少了！初學期基本上全方位都有機會摔，和摔時都全力落地，每次都『全力以赴』都幾金！
小貼事？？！！初學買厚些啦！進階可以試選用新科技啦！但初學的你說好似新科技堅好多喎！你睇你自己受痛能力啦！我不是你！
如果試過一次摔到後，直腸好像有些東西會直飛出來的話！我估你知道點選擇！
圖片2: 各滑雪品牌護臀褲型
圖片3: 其中一些護臀長褲款
圖片4: 真正又型又有款，唔好笑呀！嚟緊直銷全世界滑雪場！hahaha
保你一世咩之(二) by 282828
上週世窗室內滑雪場一大早，某大遍天花的油漆連一些表層木材掉了下來，迫了一票人那週要自找活動。好驚人？還可以啦！話晒以前親眼睇住佢另一段（尺吋跟今次的還大一點點，話晒十八年前的技術）由天花開始跌落雪道的歷史一刻！止於用甚麼用料，甚麼技術會再修好？或更好？那就關我咩事！維修是園方的工作嘛！ 廢話不多，正式入題，今次談護膝！通常一般腦力閃過一定是打排球的護膝，夠厚（好似幾厚咁），易買，便宜，連救球撞落地都好似無事等！？可不可以？……出國用都可以……頂到幾下，但有問題的是它是會「走位」的。打排球著短褲走了位都可以即時用手調整，但滑雪著長褲要調就有難度和會愈用愈薄；當然第二諗到的是直排輪用的護膝（圖3 - 直排輪用護膝附送薄薄的固定護套，你可以著在護膝內，有些人會當第二層保護！），本人本身以前都愛用（特別練習新技能）。表層有硬殼，內層軟組織夠厚，背面上下各有條彈性魔術貼拉緊固定用（有少量走位），保護性十足（但如果淘寶一套都是$50人仔那些別論）。基本上保護性無問題！缺點是太大件！好彩那時興超闊超大雪衫褲style,所以穿著上來都叫「遮得到」（而家興「窄到天荒地老」那些就穿不上了）；第三會想到的可能比較專的，MTB（越野單車）護膝－修身，保護更全面（會有機會左右腳膝則面炒落地），透氣；正面都有硬殻（但近年好多品牌都改用軟殻，軟殻是指用新科技「軟膠」吸震，得唔得？睇你忍痛能力啦～），因為通常都是立體設計，走位機會低很多；第四是真的是滑雪專用的護膝，有甚麼分別，現在都是興比較偏薄，又是用了新科技吸震咁啦（都有些還是會用硬殼面），輕身易收藏等等！因為真的是雪地還有點軟度（看天氣啦！有時硬過石屎！） 你問那邊樣好？我梗係答睇你忍痛能力啦！話晒每個人的膝蓋「可受傷能力」都不一樣！一個做開腳部運動，同一個做開「打麻雀」手部運動，點會一樣呢！？玩完炒完你覺得會痛便知這個不太好囉！Hahahah~ 但你問我用開邊款？咁就可以答你！（三）和（四），（三）我現在用在落park時，跳台玩box或用鎚頭板時carve時用（carve都用，試過用（四）在世窗同一天炒過幾次，即瘀！博唔過！） 那（四）幾時用？一般出國滑行，粉雪和backcountry 時用，（玩粉雪都用？！你點知雪下面有無石頭或樹枝？！雖然心理作用比較多！）負擔少點，滑起上來輕鬆，活動力提升，行上山時減少阻力！！但唔代表炒唔痛喎！些少囉！都會走位，自己手作處理！ 現在又有些（都好多）新科技話點跌都唔痛，用鏟飛撞去都無事！你問我信唔信？信有些幫助囉！唔痛？如果你把所謂的新科技放在你手背上，我用鎚仔打你隻手，你唔「叫」咪當唔痛囉！（通常事主第一時間會縮沙！） 國內某品牌曾經話D3O因會在-30幾40度下（本人玩過-26，直頭即刻想番酒店訓，還滑雪喎！），自我復原會減退，差點會硬化爛掉，所以自研一款新科技，又薄又輕又保護，老闆親身拍視頻試鎚仔打手背（隔住新科技）無事！我有朋友即買即用，後果是怎樣？我見佢用完，行路「趌」下「趌」下囉！唔問啦！ 如果是世窗或室內場我自己首選（二）（三）啦！「哥哥」是自己的，睇一次跌打醫生都五六百，用來食餐「好西」好過啦！又要停玩兼有傷患，為甚麼呢？型？邊忽呀！ 何謂好的護膝？除了基本的唔走位（走少D啦！點知你點玩姐！ ），鬆緊合適你自己的「哥哥」，透氣和炒左真係唔太受傷和痛（純個人感覺）等外！當然要看你著了護膝後，穿不穿得下雪褲啦！你要在「靚」和「保護性」兩者作出選擇！ 價錢四百至過千都有（只係護膝一對），基本上最好梗係試穿，有雪褲在手更加穿整套試最真！（試嘢梗係認真試啦！到時唔fit傷左係得一個字-7）坐下，行下，屈下腳咁，試下會不會太緊（指條滑雪褲）！ 有些人為了靚選擇「窄到天荒」，那護膝只可選用偏薄款！有無問題？！話阿邊個都咁用無事喎！咁咪無事囉！ 你想點咪點囉！「哥哥」是你自己的，咁大個人識分了吧！不囉唆！受傷看醫生的又不是我！！！當然你預會玩或學滑雪一段時間，對自己好點，買對好些吧！（如果還在舊公司工作，一定話賣廣告）到時傷了比醫生錢之餘又再比錢買新護膝，完全「Double Pay」概念！ 下次終於寫護pat，咁都要分第二篇？係㗎！唔係點騙稿篇數！ 下週見～ 1.D3O曾經是新科技物料，現在各品牌都比較少用了！ 2.排球護膝，還是留翻打排球時用吧！ 3.這是拉緊『哥哥』週圍肌肉或固定關節用！不是用來保護膝蓋用！ 4.直排輪用，厚到呢！ 5. MTB專用護膝，個人都算覺得不錯！ 6.滑雪品牌或運動品牌出的護膝，一看就知『好』啦！總知你覺得好咪得啦！ 7. 哩款真係嚟緊㗎！絕對真心推介!...
保你一世咩之(一) by 282828
又過一週！今次終於寫（講）一下保護裝備！
講保護裝備前,講下點解要買保護裝備！不清楚或完全不知「滑雪」是甚麼東東前，最容易接觸的一定是電影或電視劇，男女主角滑得出色（外國製作公司好多時會請差不多身型的贊助選手演出，包到咁，邊個認到？！），之後向後瞓落D雪到，懶開心咁！（戲就咁拍，如果見雪你就咁向後瞓，有件大石頭喺係下面凸起咗，你就可以收得板。如果係折斷的樹頭，你就真係死待2開場嗰個音樂盒一樣）咪顛啦！
保護裝備其實是必然要買的，當然古語有云，你傷你賤，我親生㗎咩 (呢句古語明就明，唔明就算)！你當然可以選擇唔買！命係你自己的！有些人說：「我滑雪唔洗頭盔㗎！我唔著護腕的！」就我個人而言，有人問我都會答我買齊晒！我從來不答人應不應買，特別對初學或不認識這個運動的人說：「唔洗用呀！傷不到的！阿邊個邊個都無用啦！」你不是我，我不代表「他」，我邊知「他」怎滑？！怎知「他」會在甚麼情況、地型下摔倒！？他因為你一句唔洗啦而無買，又後來傷左，咁點呢？！唔通講:「下次小心D啦？滑雪係咁㗎啦！」咁得意？！而我建議是「你認為有必要，覺得自己會受傷的，買吧！」如果你說好貴啊！那不要在不會落雪的亞熱帶地區玩「滑雪」這個運動！人生除了「滑雪」還有好多其他嘢玩的！如果你真係好想玩，便落些本吧！（唓～上兩篇你都無買啦！？當時唔知嘛！）
保護裝置大概有護腕、護肘、護膝、護pat衭和頭盔！
先講護腕，現在都好多人會慢慢不用。除了覺得唔『型』外，主因係護腕是穿在手套内，穿著時麻煩，因為通常買手套時可能要買大一碼；加上諗諗下會覺得好少會傷到呱，好多視頻個選手都無用啦！（傷咗你唔知啫！）就開始不用！但九成九的初學者，向後或向前跌時，必然會用手「撐」地，即使跟教練學習了正確的摔法，但由小朋友成長至成年的人體防摔法最基本都是用手「撐」，一時的確難改變的！所以才會有「護腕」這個產物的出現！我有無用？？？練新招時都會使用中！一般傷便是手掌紅腫，手腕痛楚或過份撞擊導致那份力量上了肘或肩，嚴重便是手腕骨碎裂或移位（手腕由比較大的八粒細骨組成）可能要開刀的（有認識的人被處理過，康復時間絕對漫長～～最麻煩係第二朝要番工）！
市面上及網上都有專用的滑雪用護腕套，通常那個護腕套的底位內置會有一條扁寬的鋼片或硬膠片，主要提供你「撐」時的保護。有些人說用過後爛了，不耐用！但反方向想，那個護腕可能保了你的手一命了，用一世咩！也有連手套內置的（肉酸D囉！但我有兩對！hahah）通常百幾至四百蚊到，基本上都夠安全啦！
可能你問滾軸溜冰（直排輪）嗰款得唔得？？都得的！（主要分辨為手掌位至腕位的硬膠條會『凌空』，不會像滑雪用的緊貼手型，因為佢地炒石屎地用）你可能會覺得哩款"堅D"，但穿著時比較麻煩，和因凸出的位置加快了手套的磨損、擦爛。所以有些人會買直排輪那款保護裝置代替滑雪那款！基本上都可以，的確比較平宜，但最好都買貴一點點囉！牌子好點、厚點！我看過有初學者受傷是因爲那套「保護裝備」為主因，比D硬膠反撞傷！問他那套東西幾錢，＄50人仔！淘寶貨！！（但我都看過淘寶貨的好野，都便宜的！點解要為嗰幾百蚊用身體做試驗呢？一次鐵打都要四五百，最少都兩劑啦！）
那鋼片定硬膠片好？個人喜好啦！金屬當然堅啦但重！膠就輕但會有機會斷！（還有些軟膠條款的，個人就覺得初學硬些少好點，有點經驗後改用會更佳！）
點穿？（咁都要教？？係呀！我試過最少八次在無講解的情況下，都係有人穿錯！）先把護套平放在平面上，有硬膠或鋼片底的向下，兩個護套對內或對外（睇你點放啦）都各有一個孔，是給大姆指穿的，其餘各四隻手指穿向上。正常情況下，鋼片或硬膠片位會貼在『把脈位』（中醫把脈嗰個位置，如果沒有便是穿反了）。之後把腕位摩術貼順位貼上便可！何謂合適？！不緊不鬆，可以連手套一齊穿內便叫可以了！
有些護套款上下都有硬膠的，和傳統的單面那個好？其實都差不多，當然sell你買就多多好處啦！那公平些講，多層保護囉！但難穿手套囉！
可不可以把護套穿手套外面？可以，護套是你的，你話事啦！當然穿外面就可能加速爛的機會（看過一些視頻選手都穿手套外面？有的！但通常是皮製的，給carving 選手用的！）
置於護肘，老實講，真的好耐都無用過（當然是採用正確的摔倒方法）。但有時總有時運低，明明全身都無撞到，係撞手肘，shxt~
都係嗰句命是你自己的，不要人地講一句唔洗啦！而增加見跌打師父的機會！
今次寫到呢到，下次講護膝，護pat衭和頭盔！
1.大眾型號
2.硬和軟膠條
3.直排輪用護腕，紅圈為凸出凌空位置
4.疑似凶器！hahahah~
神唔神，化唔化 by 282828
喺呀！未到一個禮拜㗎!
不過想happy share 一單嘢！近年真係多了香港人學滑雪，還多了人上世窗練習。人多會點？千奇百怪囉！不斷重複的偷板事件s，偷攞板架用（我朋友就是其受害者之一，成個板袋俾「人」掉左，最慘係攞架者係「人」都識添！唉！～）。近月有一名自稱不知是「愛國團體」還是「外國團體」話唔見左板袋 (做左大半年會員咁啦，咁大支鐵!!!)，向雪場其中一個領班投訴，最初我倆都以為是要求報警報失，但又不是喎！話板不要緊，反要求雪場重新整理「規劃」，寫一份報告書電郵給他！(吓！吓！吓！當時我和另一KGB社員坐在旁聽到一頭霧水) 領班聽完都笑左出嚟。受害者還希望要見更高的領導喎…喎…喎…
之後有世窗員工被他「恐嚇」？！？！職員話點解而家D會員質素咁差！（關咩事！係有錢就可以做會員啦！）當然「恐嚇」一詞的定義大家都可能有出入（但後來得知那一「句子」真係恐嚇!)，但相信口氣絕不是nice囉！人哋打份工啫，衰D唔好聽，喺雪場唔小心攪到斷手斷腳，最後咪又係工作人員抬你出嚟車你去醫院，難道你朋友有擔架咩？！！（你可以話佢份工包㗎喎！如果佢攞正嚟做就應該立刻封場，全部人要走，再用保溫衣物包住你。之後點……由你喺雪場凍囉！有常識都知－第一，唔好隨便移動傷者(或傷者自身都應該不能自己移動)。第二，不關事人不要圍圈睇熱鬧，向職員複述傷者點炒，之後等專業救傷人員入雪場救你囉！咁就正解喇！）點會同一個會有機會救你或你朋友的人嘈交兼「恐嚇」㗎！當然如果真係「傻」的，就真係別論啦！不過好似真心要驚！因為聽聞真喺傻㗎！無仇報！hahaha~
